Yng nglyn â Ymddiriedolaeth Natur Gogledd Cymru

Ein gweledigaeth

yw Gogledd Cymru gyda chyfoeth o fywyd gwyllt a fwynheir gan bawb. Mae Ymddiriedolaeth Natur Gogledd Cymru yn un o blith 47 o Ymddiriedolaethau Natur ledled y DG ac yn un o blith 6 Ymddiriedolaeth Natur yng Nghymru. Rydym yn elusen gofrestredig, sy'n dibynnu ar roddion ac ar gefnogaeth ein haelodau. Gyda'ch cymorth chi, rydym yn credu y gallwn wneud llawer i warchod y bywyd gwyllt sydd ar ôl ac i wella cynefinoedd ar gyfer bywyd gwyllt Gogledd Cymru.
Amcanion Ymddiriedolaeth Natur Gogledd Cymru

Gwarchod bywyd gwyllt Gogledd Cymru ar gyfer y dyfodol.
Cynyddu'r ddealltwriaeth o fywyd gwyllt Gogledd Cymru a'i amgylchedd naturiol.
Defnyddio'r wybodaeth hon wrth warchod bywyd gwyllt yn ymarferol yn ein gwarchodfeydd natur ac mewn mannau eraill ledled Gogledd Cymru.
Sicrhau bod aelodau'r cyhoedd yn cael cyfle i fwynhau bywyd gwyllt Gogledd Cymru.

Mae Ymddiriedolaeth Natur Gogledd Cymru yn:

Buddsoddi yn y dyfodol drwy helpu pobl o bob oed i werthfawrogi a deall bywyd gwyllt yn well
Prynu a rheoli gwarchodfeydd natur
Ymgymryd â phrosiectau sydd o fudd i fywyd gwyllt mewn trefi ac yng nghefn gwlad
Herio datblygiadau sy'n bygwth cynefinoedd bywyd gwyllt
Gweithio gyda'r cyhoedd, cymunedau, perchnogion tir, cynghorau lleol ac eraill i warchod bywyd gwyllt ar gyfer y dyfodol.

gwarchod natur ar gyfer y dyfodol

Mae'r gwarchodfeydd yn gartref i amrywiaeth eang o gynefinoedd a rhywogaethau, ac maent yn amrywio o ran maint o sawl hectar i lai nag un, ac o ran statws o Warchodfa Natur Genedlaethol i ardaloedd bychain iawn sy'n gartref efallai i ddim ond un rhywogaeth o ddiddordeb. .

Spinnies

Aberogwen
SH 613 721
8 erw

Lagŵn arfordirol gyda chuddfan adar yn edrych drosto a mynediad i'r anabl yn darparu golygfeydd o adar rhydio a hwyaid yn y warchodfa ac ar Draeth Lafan.

Glas y Dorlan The Spinnies Kingfisher © JODwyer

Mae’r clystyrau tal a gosgeiddig o gawn cyffredin o amgylch y lagŵn yn darparu cysgod trwchus a safleoedd nythu delfrydol ar gyfer rhywogaethau’n magu, fel yr Iâr Ddŵr, yr Hwyaden Wyllt a Thelor yr Hesg. Mae’r Wyach Fach yn bwydo yn y lagŵn, gan ddeifio am bysgod bychain ac infertebrata, ac efallai y gwelwch y Gïach Gyffredin yn chwilio am bryfed genwair, cramenogion neu folysgiaid yn y llaid. Mae terfynau’r lagŵn yn lle rhagorol hefyd i wylio’r Crëyr Glas a’r Crëyr Bach.

Rhwng misoedd Medi a Mawrth, bydd y Glas y Dorlan llachar yn olygfa gyfarwydd o amgylch y lagŵn, yn chwilio am ysglyfaeth. Yn cadw cwmni iddo bydd y Gorhwyaden, y Chwiwell a’r Pibydd Coeswerdd.

Tra’n cerdded ar hyd y llwybrau, cadwch lygad am y Caldrist Llydanddail, tegeirian prin iawn yn lleol, a Rhedyn Tafod yr Hydd a’r Marchredyn Gwryw, sy’n tyfu mewn mannau cysgodol. Ar ganghennau’r coed, mae’r Siff-Saff a Thelor yr Helyg ymhlith rhai o adar mudol y gwanwyn sydd i’w clywed yn glir. Ceir gwahanol fathau o ffwng lliwgar yma hefyd, gyda Chwpan bychan Robin Goch yn gyffredin yn ystod y gaeaf.

Coed Crafnant

SH 619 289
120 erw

Yn enghraifft wych o Goetir Hynafol gyda chyfoeth o fwsoglau, llysiau'r afu a rhedyn, mae Gwarchodfa Coed Crafnant yn cynnwys dwy goetir nodedig; Coed Crafnant a Choed Dolbebin.

Llysiau'r Ysgyfaint_Liverwort © Rory Francis

Gyda'i gilydd, maent yn rhan o Safle o Ddiddordeb Gwyddonol Arbennig helaeth Rhinog yn y Parc Cenedlaethol. Mae'r warchodfa, sy'n 49 hectar o ran maint, yn bwysig am ei hamrywiaeth o blanhigion cyntefig, fel mwsoglau a llysiau'r afu. Mae'r rhain yn dibynnu ar amgylchedd cynnes, llaith i oroesi. Mae'r canopi brodorol o goed derw wedi darparu'r amgylchedd yma ers rhyw 6,000 o flynyddoedd. Mae'r coed yn gartref hefyd i sawl math o drychfil, aderyn a mamal.

Cors y Sarnau

SH 967 386
37 erw

Mae Cors y Sarnau'n dir gwlyb gwerthfawr ac yn enghraifft dda o gors mewn dyffryn isel, lle mae llyn bas wedi datblygu'n gorsydd a siglenni gwlybdir amrywiol. Mae'r math yma o gynefin yn brin iawn yn y DG.

Mae'r safle'n 37 erw o ran maint ac yn gartref i amrywiaeth cyfoethog o gymunedau o blanhigion sy'n adlewyrchu natur ddeinamig yr olyniaeth naturiol. Mae cynefinoedd o gorsudd, siglenni a ffeniau'n ffynnu yma.

Mae wedi cymryd cannoedd o flynyddoedd i'r cymunedau o blanhigion a'r cynedfinoedd a welir yn y warchodfa ddatblygu, ac mae'n hawdd iawn tarfu arnynty ac maent yn tueddu i sychu'n aml.

Mae tri phwll bychan newydd wedi cael wu cloddio yn y warchodfa er mwyn caniatau dŵr agored ar y safle, fel bod modd sicrhau olyniaeth yma ac er mwyn cynyddu'r amrywiaeth yn y warchodfa ac annog gwas y neidr a'r fursen i ddod yma.

Caeau Tan y Bwlch

SH 431 488
16 acres

Mae'r warchodfa'n enwog fel cartref i'r Tegeirian Llydanwyrdd Mawr a gellir gweld y blodau gwynion tyner yn carpedu'r caeau ddiwedd mis Mehefin a thrwy gydol mis Gorffennaf bron. Gyda'r Bengales Benddu, Pys y Ceirw a'r tegeirianau eraill, fel y Tegeirian Cyffredin a Thegeirian Brith y Rhos, i gyd yn blodeuo yn ystod Mehefin / Gorffennaf, dyma'r misoedd gorau i weld y dolydd ar eu gorau yn eu blodau.

Dyma'r amser gorau gefyd i weld glôynnod byw a gwyfynnod, ond braidd yn hwyr mae'n bur debyg ar gyfer canu'r adar sy'n byw yn y prysgwydd is. Mae'r adar hyn, fel y Llwydfron, y Troelwr Bacj, Telor yr Helyg, yr Ardd, y Telor Penddu a llawer mwy, yn canu ar eu gorau ym mis Mai.