Bwyd a Diod

Lleoliad: Efailnewydd

Ar ôl i chi dreulio’r noson ym Mhlas Bodegroes, lle sydd wedi ennill gwobrau lu, wedi’i leoli filltir i’r gorllewin o Bwllheli ar ffordd Nefyn, gallwch fwynhau brecwast yn eu bwyty sydd hefyd wedi ennill gwobrau dirifedi.   Dyma ddechrau gwych i’r daith!   Yn y 23 mlynedd ers i’r bwyty agor am y tro cyntaf, mae wedi ennill prif wobrau yn y maes, yn cynnwys Seren Egon Ronay ac mae'r Good Food Guide wedi rhoi 6/10 iddo.

Cysylltwch â:  Plas Bodegroes, Ffordd Nefyn, Pwllheli, LL53 5TH
Ffôn:  01758 612 363 / Plas Bodegroes
 
Lleoliad: Y Ffôr, Pwllheli (Amser teithio o Efailnewydd – 10 munud, 5 milltir)

Mae Siop Fferm Glasfryn yn rhan o Barc Antur Glasfryn sydd dafliad carreg i ffwrdd o draethau Pwllheli, Abersoch, Nefyn a Llanbedrog ac o fynyddoedd Eryri.

Os ydych yn ymddiddori mewn bwyd yna mae’n rhaid i chi alw draw yn Siop Fferm Glasfryn, ble y gellir prynu Cig Eidion Gwartheg Duon Cymreig, cig oen a chig adar hela a fagwyd ar y Stad, ynghyd â chig moch sydd wedi ennill gwobrau, sef Cig Moch Pen Llŷn.  Yn ogystal, ceir yma ddewis da o borc, cyw iâr a selsig, ynghyd â chynnyrch lleol, cawsiau, llysiau ffres a bwyd heb glwten ynddo.

Cysylltwch â:   Glasfryn Parc, Y Ffôr, Pwllheli, LL53 6PG
Ffôn: 01766 810202
Glasfryn Parc, Activity and Adventure Centre / e: info@glasfryn.co.uk

Siopau

Lleoliad: Porthmadog (Amser teithio o’r Ffôr – 25 munud, 11 milltir)

Ar ôl cerdded am dro o amgylch tref arfordirol hyfryd Porthmadog, gallwch fwynhau cinio blasus yng Ngwesty’r Heliwr, gwesty AA Rosette, ar y Stryd Fawr. Yr hyn sy'n greiddiol i'w llwyddiant yw'r cyfuniad a geir yno o ddefnyddio’r cynhwysion lleol Cymreig gorau a sgiliau AA Rosette a phrofiad rhyngwladol cogyddion y bwyty.    Mae cyfuniadau syml a chynhwysion Cymreig o’r radd flaenaf yn cyfuno i greu prydau bwyd Cymreig gwych gyda mymryn o ddylanwad rhyngwladol arnynt. Mae’n bleser cael bwyta yn yr ystafell fwyta a ailwampiwyd yn ddiweddar. Newidir y prydau bwyd ar y fwydlen i adlewyrchu’r tymhorau ac maent yn cynnwys danteithion megis Stecen o Gig Carw Morgannwg a Golwythen o Gig Oen Morfa Heli Llanelli, ac i bwdin ceir Pwdin Triog a Sinsir wedi’i Stemio neu Darten Lemon Gynnes – digon i dynnu dŵr o’ch dannedd!  Bydd y perchnogion, Louis a Viorica Naudi yn sicrhau y cewch groeso cynnes iawn yno.

Cysylltwch â: Gwesty’r Heliwr, 131 Stryd Fawr, Porthmadog, 
LL49 9HB   Ffôn:  01766 512 015
Royal Sportsman Hotel / e:  enquiries@royalsportsman.co.uk

Pan fyddwch ym Mhorthmadog, peidiwch da chi â methu'r cyfle i ymweld â delicatessen safonol Y Bwtri.   Mae wedi’i ymrwymo i gynnig y dewis gorau o fwydydd da i’w gwsmeriaid a rhoi sylw blaenllaw i fwyd Cymreig.  Y nod yw cynnig gwasanaeth bwyd llawn, gan roi'r cyfle i gwsmeriaid archebu bwyd ar gyfer achlysuron arbennig, yn ogystal â gwasanaethau eraill sydd ar gael gydol y flwyddyn megis hamperau, bwffes a siop ar-lein.  

Cysylltwch â: Y Bwtri

Lleoliad: Harlech (Amser teithio o Borthmadog – 25 munud, 10 milltir)

Beth am stopio am de bach – a ble gewch chi well na Siop De Cemlyn yn Harlech.   Oddi yno, gallwch fwynhau golygfeydd godidog o Gastell Harlech, Cwrs Golff Brenhinol Dewi Sant, y Mynyddoedd a’r Môr. 

Mae Cemlyn yn enwog am gadw dewis helaeth o De, ac mae’n cynnig dail te (nid bagiau) sy’n amrywio o’r Te Brecwast a'r Te Prynhawn enwog, i de o India megis Assam, Darjeeling a Nilgiri, neu beth am flasu cwpanaid o de o’r Dwyrain Pell megis Formosa, Oolong, Lapsang Souchong neu Keemun. Holwch am eu te Cemlyn arbennig. 

Cysylltwch â: Cemlyn Tea

Gyda’r nos

Lleoliad: Talsarnau (Amser teithio o Harlech – 10 munud, 3 milltir)

Rhowch glo i'ch diwrnod drwy fwynhau pryd bwyd bendigedig yng Ngwesty Maes-y-Neuadd. Mae’r bwyty yn derbyn canmoliaeth uchel ym mhob un o'r prif lawlyfrau bwyd ac yn bwysicaf oll, mae gwesteion wrth eu boddau â'r bwyd a gynhyrchir gan y Cogydd Berchennog Peter Jackson a'i dîm. Cesglir llysiau ffres o’r ardd yn ddyddiol ac mae bwydlen pob dydd yn canolbwyntio ar y cynhwysion sydd ar gael yn dymhorol.  Danfonir cynnyrch gwych i’r gwesty, o gig oen, pysgod o Fae Ceredigion a’r Fenai a chawsiau fferm Cymreig, mor ffres ac y gallai fod.  

Dychmygwch bryd bwyd yn cynnwys brithyll môr a ddaliwyd ddim ond awr yn gynharach, gyda thatws newydd bychan a mange tout a gasglwyd o’r ardd, wedi’i ddilyn gan fefus ffres. Ceir pedwar chwrs ar y bwydlenni, ac mae pob cwrs wedi’i gydbwyso’n ofalus i ategu’r llall. Mae’r bwydlenni’n newid yn ddyddiol.  Daw’r pryd i ben gyda Diweddglo Mawreddog sydd â phedair rhan iddo!

Cysylltwch â: Maes y Neuadd, Talsarnau LL47 6YA
Ffôn:  01766 780 200 
Maes y Neuadd / e:  maes@neuadd.com