Parc Gwledig Padarn

Lleoliad rai o atyniadau mwyaf syfrdanol Gogledd Cymru!

Ar ar y safle unigryw hwn darganfyddwch Olwyn Ddŵr anferthol, hen Ysbyty’r Chwarel gyda'i theclynnau arswydus, Trenau Stêm, Teithiau Cwch Pleser, Amgueddfa Genedlaethol gyda'i chrefftwyr yn arddangos eu sgiliau, Llwybrau Natur a Threftadaeth, Dringo, Deifio Tan-ddŵr, gweithgareddau dŵr fel Canŵio a Hwylio, Gweithdai Crefft, safleoedd picnic ac wrth gwrs, lluniaeth ysgafn!

Mae’n le delfrydol i samplu beth sydd gan gefn gwlad i'w gynnig. Oddi fewn i’r Warchodfa Natur Leol yma, sydd yn 800 o aceri mewn maint, mae dau Safle o Ddiddordeb Gwyddonol Arbennig - Coed Allt Wen a Llyn Padarn. Roedd Chwarel Vivian unwaith yn ferw o brysurdeb diwydiannol, heddiw mae'n lleoliad chwaraeon eithafol ac yn esiampl wych o adfywiad natur.

Ysbyty’r Chwarel

Ymwelwch â hen Ysbyty Chwarel Dinorwig. Mynediad am ddim.

Offer meddygol gwreiddiol o’r 1800’au. Ward, Ystafell Llawdriniaeth, Peiriant Pelydr X gwreiddiol, amryw o declynnau arswydus a Marwdy! Arddangosfeydd o hen luniau chwarelwyr a phethau cofiadwy bywyd y dramodydd a bardd lleol T.Rowland Hughes.

Ar agor 7 diwrnod o’r wythnos yn ystod gwyliau ysgol Pasg, hefyd o ddiwedd Mai hyd at ddechrau Medi. Ar agor pob penwythnos o Basg i ddiwedd Medi. Hydref i Fawrth drwy drefniant ymlaen llaw yn unig. Dilynwch y cyfeirbwyntiau coch.

Y Chwarel

Mae Parc Gwledig Padarn wedi ei leoli ar ymyl cymhlys anferthol hen Chwarel Dinorwig.
Ar droad y ganrif roedd y safle yn cyflogi tua 3000 o ddynion. Fe allforiwyd llechi o'r chwareli yma i doi adeiladau dros y byd i gyd. Yn yn ogystal â hynny fe ddefnyddir llechen i wneud byrddau snwcer, mewn  osmetigau, i adeiladu lonydd, waliau a ffensys a hyd yn oed fel meddyginiaeth homeopathig.

Pan gaewyd y chwarel fe brynodd Cyngor Sir Caernarfon y safle a gyda rhagwelid syfrdanol fei datblygwyd er mwyn caniatáu i'r amgylchedd naturiol ffynnu, sicrhau cadwraeth yr amgylchedd adeiladol ac, ar yr un pryd, hybu mynediad i gefn gwlad.

Y Goedwig

Mae Coed Dinorwig yn Safle o Ddiddordeb Gwyddonol Arbennig oherwydd mai Derw Digoes yw’r rhain. Ym mis Mai mae'r coed Derw wedi eu heigio gan Lindys y Gwyfyn Tywyll Brith. Gellir gweld canlyniad eu bwydo gwancus hyd fis Gorffennaf pan ail dyfa'r coed eu dail i ddigolledu'r ymosodiad.

Mae Cenau a Mwsogl i'w gweld yn tyfu'n doreithiog ar y coed a'r creigiau. Oherwydd bod llygredd yr amgylchedd yn cael effaith andwyol ar gen a mwsogl, fe ddengys hyn pa mor lan yw'r amgylchedd yma!

Llyn Padarn

Gyda dyfnder mwyaf o tua 30m (100 troedfedd), Llyn Padarn yw'r chweched llyn dyfnaf yng Nghymru. Mae o wedi ei ddynodi fel Safle o Ddiddordeb Gwyddonol Arbennig oherwydd bod ei ddyfroedd dwfn yn gartref i'r Torgoch Arctig, pysgodyn prin o Oes yr Iâ diwethaf. Fe welir Dŵr Lynad prin yn tyfu yn y llyn hefyd.

Yn ogystal â'r enghreifftiau o ffurfiau bywydol anghyffredin yma mae Llyn Padarn hefyd yn bwysig oherwydd fe welir yma greigiau cyn-Cambriaidd yn cael eu gorchuddio gan greigiau Cambriaidd.

Teithiau Cerdded

Cylchdaith y Llyn

Mae'r gylchdaith hon, sydd oddeutu pum milltir o hyd, yn cychwyn ym maes parcio Gilfach Ddu. Am y rhan fwyaf o'r daith dilynir llwybrau penodedig a ffyrdd gwledig tawel. Mae'r daith yn gymharol hawdd ac yn cynnwys nifer o olygfeydd gogoneddus o'r ardal.

Llwybr Vivian

Mae'r daith ogoneddus yma yn cyfuno archeoleg ddiwydiannol gyda phrofiadau ardaloedd gwyllt. Mae'n cynnwys agweddau o ddiwylliant a chaledrwydd y diwydiant chwarelu ac yn rhoi golygfeydd digyffelyb o'r mynyddoedd a'r llynnoedd o'ch cwmpas.

Taith y Goedwig

Gorchuddiodd coedwigoedd naturiol dirlun gogledd Cymru, a gafodd ei greu yn ystod y cyfnod rhewlifol olaf. Cliriwyd y rhannau mwyaf ffrwythlon o'r dyffryn gan ddyn ar gyfer ffarmio. Yr hyn a adawyd ar ôl oedd y rhannau anghysbell hynny o'r goedwig ni ellid eu ffarmio. Y mae Coed Dinorwig yn rhan fechan o'r coedwigoedd cynnar hynny.

Y Llwybr Natur

Caniatâ'r Llwybr Natur hwn i chi chwilota a darganfod lledrith Coed Dinorwig.

Llwybr Glas y Dorlan

Mynediad ar gyfer y llai abl – mae’r llwybr yn arwain o faes parcio Gilfach Ddu ac wedi ei greu yn arbennig ar gyfer y llai abl a chadeiriau olwyn. Ymwelwch â glan y llyn neu ewch i weld dringwyr a deifwyr yn Chwarel Vivian neu ymweld a'r unig inclein lechi yn yr ardal sy'n gweithio.

Ysbyty’r Chwarel

Dilynwch y llwybr i gael golwg agosach ar yr hen Ysbyty’r Chwarel.

Gwybodaeth Hanfodol

Dymunwn i chi fwynhau eich ymweliad i Barc Gwledig Padarn ond, os gwelwch yn dda, byddwch yn ymwybodol bod rhai ardaloedd o'r Parc yn gallu bod yn beryglus a dylid goruchwylio plant a chymryd gofal bob amser.

• Dilynwch lwybrau gyda chyfeirbwyntiau yn unig
• Peidiwch â mynd mewn i adfeilion adeiladau
• Cadwch draw o hen adeiladwaith chwarel
• Mae rhai llwybrau yn anesmwyth gyda llethrau serth
• Dim nofio mewn unrhyw ddŵr
• Nodweddion eraill y Parc yw hen weithfeydd chwarel, llwybrau coedwig
lethrog a dyfroedd dyfnion.