Lansio pecynnau gweu Cymraeg. Dyluniwyd saith pecyn gweu newydd gan Hilary Collins, dylunydd o Ynys Môn, ar gyfer Melin Wlân Trefriw. Mae’r edafedd gweu gwlân pur sy’n rhan o’r pecynnau yn cael ei gardio, ei droelli, ei ddyblu a’i liwio ym Melin Wlân Trefriw a rhoddir edrychiad unigryw i’r cynnyrch gorffenedig gydag addurniadau tapestri gwlanog Cymreig ar ffurf blodyn.

Mae’r patrymau gweu yn cynnwys cap gwlanog a dyrnfolau (ar gyfer oedolyn neu blentyn), cynheswr gwddf / het, ysnoden, siôl, bag ysgwydd bach a sgarff ffriliog.  Mae’r pecynnau yn addas ar gyfer dechreuwyr neu bobl sy’n dychwelyd i weu yn ogystal â gwewyr mwy profiadol.  Edafedd aran sydd yn y pecynnau, sy’n gweu’n gyflym.

Mae’r pecynnau ar gael mewn chwe lliw:- gwlân gweu aran gwyn naturiol, coch, glas, gwyrdd, cwrel a glas tywyll gyda deunydd tapestri gwlanog ar gyfer y motif.

Mae’r pecynnau a’r patrymau gweu ar gael yn Gymraeg ac yn Saesneg.  Rhoddwyd cyngor a chymorth ariannol ar gyfer datblygu’r pecynnau drwy Brosiect ‘Bauhaus’, Prosiect Datblygu Rhanbarthol yr UE, sy’n cael ei redeg gan Gyngor Bwrdeistref Sirol Conwy ac Annog Cyf.

Bydd y pecynnau yn cael eu lansio yn y Farchnad Decstiliau ym Melin Wlân Trefriw ddydd Sadwrn, 5 Rhagfyr a dydd Sul, 6 Rhagfyr.   Mae’r Farchnad Decstiliau yn llawn cynnyrch gan ddylunwyr a chrefftwyr o Ogledd Cymru ac mae’n cynnwys anrhegion Nadolig a wnaed â llaw fel hetiau a menyg ffelt, sgarffiau wedi’u gweu, llusernau batic, clustogau a frodiwyd â llaw, doliau wedi’u gweu, cardiau ac addurniadau i’w rhoi ar y wal, yn ogystal â deunyddiau, edafedd, ac offer ar gyfer troellwyr, gwewyr, ffeltwyr a brodwyr.